ཞལ་གཟིགས་དང་ལས་འགན།

ང་ཚོས་རང་གི་ལས་ཀ་རྣམས་ལྷག་བསམ་རྣམ་དག་གིས་གཞན་ལ་ཕན་འདོགས་པའི་བསམ་པས་སྒྲུབ་པ་དང་། རང་གི་མཆོད་པ་དང་སྦྱིན་པ་འདི་དག་ནི་སྡུག་བསྔལ་སེལ་ཞིང་རང་ཉིད་ཡང་དག་པའི་མི་ཞིག་ཏུ་འགྱུར་བར་བྱེད་པའི་རིན་ཐང་བྲལ་བའི་ལེགས་སྐྱེས་ཤིག་ཏུ་བལྟ་བར་བྱའོ། །

ང་ཚོའི་ཀུན་སློང་ནི་སེམས་ཅན་ཐམས་ཅད་དང་ང་ཚོས་མཉམ་སྤྱོད་བྱེད་པའི་འཇིག་རྟེན་འདི་ལ་སེམས་ཁུར་བྱེད་རྒྱུ་དེ་ཡིན།

ང་ཚོས་རང་ཉིད་དང་ལས་རོགས་རྣམས་ལ་འཛིན་པའི་རྣམ་འགྱུར་དང་། ཁོར་ཡུག་དང་ང་ཚོས་ཞབས་ཞུ་སྒྲུབ་ཡུལ་གྱི་མི་མང་དང་སྤྱི་ཚོགས་བཅས་དང་འབྲེལ་འདྲིས་བྱེད་སྟངས་ཀྱི་ཁྲོད་དུ། གསལ་པོ་གྲུབ་པའི་བཟང་སྤྱོད་ཀྱི་རྣམ་གཞག་ཅིག་ལག་ལེན་དངོས་ཀྱི་ཐོག་ནས་མངོན་པར་བྱེད་པར་འབད་བརྩོན་བྱེད་ཀྱི་ཡོད།

ང་ཚོའི་ཚུལ་ཁྲིམས་ནི་གཞན་ལ་གནོད་པའི་ལས་རྣམས་སྤོང་བ་དང་། དགེ་བའི་ལས་ལ་ཤེས་བཞིན་དུ་འཇུག་པ། ནུས་པ་ཡོད་དགུས་གཞན་ལ་ཕན་འདོགས་པ་བཅས་ལ་དམིགས་པ་ཡིན།

ང་ཚོ་རང་ཉིད་དང་དཀྱིལ་འཁོར་ནང་གི་མི་རེ་ངོ་རེ་དེ་བཞིན་ང་ཚོའི་སྤྱི་ཚོགས་བཅས་ཀྱིས་དྲང་བདེན་དང་། ཕྱི་གསལ་ནང་གསལ། འགན་འཁུར་བཅས་ཀྱི་ཚད་གཞི་མཐོ་ཤོས་བཟུང་སྟེ་གནས་པར་བྱེད་དོ། །

ང་ཚོས་རང་གཞན་གཉིས་ཀར་དཀའ་ངལ་གྱི་གནས་སྟངས་རྣམས་དྲན་ཤེས་དང་། སྙིང་རྗེ། ཤེས་རབ་བཅས་ཀྱི་སྒོ་ནས་གདོང་ལེན་བྱེད་པར་མཁོ་བའི་དུས་ཚོད་དང་བར་སྟོང་སྤྲོད་ཀྱི་ཡོད།

ང་ཚོས་སྡུག་བསྔལ་ལ་ཇི་མི་སྙམ་པར་ཞི་ཞིང་དུལ་ལ་བཟོད་པར་གནས་སོ། །

བདག་ཅག་གིས་བགྱིད་པ་བཞིན་གཞན་དང་རང་བཞིན་གྱི་ཁོར་ཡུག་ལ་ཞབས་ཏོག་བསྒྲུབ་པ་ནི་བསོད་ནམས་དང་སྐལ་བ་བཟང་པོ་ཞིག་ཡིན། བདག་ཅག་གིས་བརྩོན་འགྲུས་དྲག་པོ་བསྐྱེད་ཀྱང་ལས་ལ་དགའ་བ་སྒོམ་ཞིང་རང་ཉིད་ལ་བརྩི་མཐོང་ཆེན་པོ་མི་བྱེད། དམིགས་ཡུལ་བྱེ་བྲག་པ་འགྲུབ་པ་དང་འདྲ་བར། བཞད་གད་དང་། འབྲེལ་འདྲིས། ཉམས་ལེན་བྱེད་པའི་དུས་ཚོད་བཅས་ནི་བདག་ཅག་ལ་གལ་གནད་ཤིན་ཏུ་ཆེ་བ་ཡིན་ནོ། །

ངེད་ཅག་གིས་ཡིད་ཆེས་དང་མཛའ་བཤེས་ནི་སྤྱི་ཚོགས་ཀྱི་གཞི་རྟེན་དུ་བཟུང་ནས་སྐྱོང་བར་བྱེད་དོ། །

བསམ་གཏན་ལ་བསྟེན་ནས་སེམས་སྦྱོང་བར་བྱེད་པས་ནི་རྩེ་གཅིག་པ་དང་། མཉམ་པར་བཞག་པ་དང་། བཏང་སྙོམས་རྣམས་གོམས་པར་བྱེད་དོ། །

ང་ཚོས་ཕན་ཚུན་གྱི་གཞི་རྩའི་བཟང་པོའི་ཡོན་ཏན་དང་སྙིང་རྗེ། ཤེས་རབ་བཅས་ལ་ངོས་འཛིན་བྱེད་ཀྱི་ཡོད།

ང་ཚོའི་ལས་དོན་ནང་ངོམས་པ་མེད་པའི་ཤེས་འདོད་ཀྱི་བསམ་པས་ལམ་སྟོན་བྱེད་ཀྱི་ཡོད། ང་ཚོ་ནི་ཁེངས་སྐྱུང་ལྡན་པ་ཞིག་ཡིན་པར་མ་ཟད། ཕན་ཚུན་དང་ང་ཚོས་ཞབས་འདེགས་ཞུ་ཡུལ་གྱི་སྤྱི་ཚོགས་ལས་སློབ་སྦྱོང་བྱ་རྒྱུ་མང་པོ་ཡོད་པ་ངོས་འཛིན་བྱེད་ཀྱི་ཡོད།

ང་ཚོས་རྒྱབ་ལྗོངས་དང་སྤྱི་ཚོགས་ཀྱི་ངོ་བོ་འདྲ་མིན་ཡོད་པའི་སྐྱེ་བོ་ཀུན་ལ་དགའ་བསུ་དང་མཐོང་ཆེན་ཐོབ་པའི་ཁོར་ཡུག་ཅིག་བསྐྲུན་པ་བརྒྱུད། ཕན་ཚུན་གཅིག་ལ་གཅིག་རྟེན་གྱིས་རོགས་རམ་བྱེད་བཞིན་ཡོད།